Vitsy sisa ny olona azo itokisana ka azo ampidirina an-trano. Tetsy Ambondrona, olona mpantsaka rano amin’ny « bidon jaune » ary efa zatra mamatsy rano amin’ilay tokantrano no nivadika tampoka. Nodarohany ilay ramatoa mpanakarama azy ary efa nanomboka nangorona ny entana tao an-trano izy no raikitra ny antso vonjeo. Nifarimbona ny mpiray tanàna ary nitsoaka ilay olon-dratsy. Niditra an-tsehatra nanenjika koa ireo mpiambina hotely teo an-toerana ary mba voasambotra ihany ilay mpamaky trano miafina amin’ny asa mpantsaka rano. Saingy tsy nilamina teo ny raharaha satria tao anatin’ny fotoana fohy dia tonga avokoa ny jiolahim-boto naman’ilay olon-dratsy naka azy. Tsy afa-nanohitra intsony ny mpiambina ary dia afa-maina ny mpamaky trano. Rehefa tonga ny polisy dia raikitra fifanenjehana be teo amin’ny manodidina. Efa mandeha ny feo fa tadidin’ny olon-dratsy ilay ramatoa vaky trano ary hovalian’izy ireo faty. Mihorohoro avokoa ny manodidina noho ny afitsok’ireto mpantsaka rano ireto. Ny rano anefa tsy misy afa-tsy izy ireo ihany no afaka mahazaka mitatitra izany.
D.R
