Mitohy ny vaky trano eto an-tampon’ny tanàna. Ny herinandro lasa teo, dia nandrenesana vaky trano saika isan’alina ary toa mitovitovy avokoa ny fomba entin’ireo jiolahy manao ny asa ratsiny,
mandeha amin’ny andiany tsy latsaka roapolo lahy, ary iray ka hatramin’ny tranom-ponenana, na magazay telo na efatra no lasibatra amin’izany, sady mitondra fitaovam-piadiana, toy ny famaky, antsy lava lela, lefona, basy vita gasy, sns… Famaky no nentin’ireo jiolahy mamaky varavarana na varavarakely ary ny sasany manao tampim-baravarana, toy nitranga ny zoma alina lasa teo tokony ho tamin’ny 11 ora alina tao Ampitahana. Lasa avokoa ny entana ao an-trano ary talohan’izany tao Vatovory, Ambohimiadana, Manolotrony sy ny sisa.
Tsy andrenesam-peo ireo manampahefana hatramin’izao, miainana anaty tebiteby ny vahoaka isan’alina. Ahiana araka izany fa miharatsy andro aman’alina ny toe-javatra misy eto amin’ny renivohitry ny faritra Amoron’i Mania, fa manam-petra ny zava-drehetra.
Anastase