Niakatra ny maripàna tany amin’ny Distrikan’ Ampanihy Andrefana, ny faran’ny herinandro teo. Raha ny tati-baovao voaray avy any an-toerana, tsy nanaiky ny fitakiana vola 52 000 ariary isaky ny mpianatra ireo Ray aman-drenin’ny mpianatra ao amin’ny lycée Fotadrevo, satria voalaza fa voaroaka izay tsy mahaloa. Noho ny fanamparam-pahefana sy ny tsindry hazo lena voalaza ihany koa fa ataon’ny « Proviseur » ao amin’ity liseam-panjakana ity, dia tezitra ireo mpampianatra sy ny Fram, ka nofantsihan’ ireo Ray aman-drenin’ny mpianatra vao maraina ny biraon’ ny « Proviseur ». « Fantsihanay Ray aman-dreny ity birao ity ary tsy misokatra raha tsy tonga ny proviseur vaovao. Ny mpianatra kosa mahazo mianatra ihany », hoy ny vakin’ny sora-baventy miranty mipetraka amin’ny varavarambe voafantsika. Manoloana izao toe-draharaha izao, miantso ny tompon’andraikitry ny Fampianarana ao amin’ny Faritra Atsimo-Andrefana ireto mpampianatra sy Ray aman-dReny mba hitady vahaolana haingana.
Eric Manitrisa
