Ny alatsinainy alina tokony ho tamin’ny folo ora latsaka, mpitondra môtô iray no nofaohana semi-remorque, teny Ampefiloha. Nandriaka ny rà, niparitaka eran’ ny lalana ny atidohan’ity tovolahy ity taorinan’ny nitrangan’ny loza. Semi-remorque iray no nandona azyka nianjera itsy farany. Noho ny hamafin’ny fifandonana dia tsy tana intsony ny ain’ity mpitondra môtô ka nalefa avy hatrany tany amin’ny morgue. Raha araka ny vaovao voaray, dia tovolahy 24 taona ity maty tsy tra-drano ity. Rehefa nitranga ny loza dia nandeha ny resaka fa nitsoaka ilay mpamily. Raha araka ny nambarany tamin’ny fakana am-bavany azy anefa, dia tsy nahita sy tsy naheno zavatra hafahafa akory izy ka nanohy ny diany hatrany. Ny olona nanatri-maso no niezaka nanenjika azy ka nampahafantatra azy ny loza. Nanatona avy hatrany ny polisy eny amin’ny boriborintany fahafito anefa itsy farany taorian’izay. Eo am-panatanterahana ny fanadihadiana ny polisy ankehitriny hamoahana ny antony nety niteraka ny loza.
Kanto R. (Stagiaire)