« Tsy fantatra aloha hatreto izay tena nanosika azy, hanao an’ity fihetsika ity (…) Mbola hisy ny fanadihadiana ireo fianakaviany aorian’ny fikarakarana ny razana » hoy ny fanazavana nentin’ny kaomandin’ny tobim-paritry ny zandary ao Fenoarivo. Nisehoana tranga nampihoro-koditra tokoa tao Ambodizozoro, Ampitatafika ny andron’ny talata teo. Tovolahy iray, manodidina ny 26 taona no nihanika irony « pylone », mpitondra herinaratra mahery vaika irony. Nisy nahita izany ary nampandrenesina haingana ny tompon’andraikitra. Tonga teny an-toerana avy hatrany ny zandary niaraka tamin’ny sefo fokontany tao an-toerana ary fianakaviana akaikin’ity tovolahy ity. Na dia teo aza ny fandaminan-tsaina sy ny fandresen-dahatra ireto farany dia mbola nanohy ny fihaniany ilay andrin-jiro avobe ihany ny lehilahy. Ary nony tonga teny amin’ny fara-tampony dia nanapa-kevitra avy hatrany hitsambikina sy hitsoraka. Marihana fa manodidina ny 30 metatra eo ho eo ny haavon’io « pylone » hoy ny vaovao. Potika tanteraka ny vatany nony niarapoka tety amin’ny tany. Nezahina ihany ny nitondra azy nankany amin’ny toeram-pitsaboana saingy tsy avotra intsony ny ainy, raha ny fanazavana azo hatrany.
m.L
 Mbola hisy ny fanadihadiana ireo fianakaviany...){kind=link}