Arifomba tokoa ny fitaovana entin’ireo jiolahy manafika
Teny Analamahitsy, ny sabotsy lasa teo, no tratehaky ny zandary teny Analamahitsy Marais-Masay ny andian-jiolahy mitam-basy. Enina izy ireo no fantatra fa ao anin’ity tarika mpanao ratsy ity, araka ny loharanom-baovao. Jiolahy efatra no voasambotra fa ny roa kosa tafatsoaka. Vaovao azo avy amin’ny fitsongona dia tetsy sy teroa no nahafantarana ny mikasika ireto olon-dratsy ireto. Ny vaovao voarain’ny mpitandro filaminana hatrany no nahalalana fa saika hanafika teratany sinoa teny amin’ny faritra Analamahitsy izy ireo. Tsy tafita anefa ny kajy satria nisy nampiahiahy ny fisian’ny olona nipetrapetraka teo amin’ilay toerana saika hanaovana ny fanafihana. Rehefa tsy raikitra moa izany dia nikaon-doha izy ireo nidina tety amin’ny Marais-masay, teo indrindra no nilatsaka ny fisamborana ka tsy nahahetsika ny efatra fa ny roa izay somary nihataka ireo namany kosa no tonga dia lasa nandositra raha vao nahatazana ny fahatongavan’ireo zandary. Tratra niaraka tamin’izy efa-dahy tamin’izany ny PA miisa roa sy barre pince roa ary basy kilalaon-jaza iray, scotch ary itony rano fanatoranana na « chloroforme ». Efa natolotra ny fitsarana izy ireo ka mbola mitohy moa ny fanadihadiana amin’izay ho mety niafenan’ny naman’izy ireo. Efa tena rain-dahany tokoa raha ny fahitana ireto fitaovana tratra tany amin’izy ireo ireto.
ALEM
