Nitrangana vono olona mahatsiravina tao amin’ny tanana iray antsoina hoe Ambahakarabo, ao amin’ny kaominina ambanivohitra Belaoko Lokoho, any amin’iny distrikan’Andapa iny ny faran’ny herinandro lasa teo. Lehilahy iray tokony ho 44 taona tany ho any ho hita faty tao an-tranony. Tsy fantatra mazava izay zava-niseho tao amin’io tokatrano io. Raha ny vaovao azo dia efa vatana mangatsiaka sy rà mandriaka sisa no novantanin’ireo mpitandro filaminana. Ny fizahana nataon’ireo mpitsabo no nahafantarana fa daroka sy vely « bois rond » teo amin’ny lohany no nahafaty izany olona izany. Nanao ny fikarohana izay olona tompon’antoka tamin’ity vono olona ity avy hatrany ny pôlisy ary tsy ela dia fantatra izy ireo. Lehilahy iray sy vehivavy sakaizany, izay hitan’ny olona nivoaka io trano io. Tsy lasa lavitra moa ireto olon-dratsy ireto, izay nitsoaka raha vao nahavita ny asa ratsiny, fa voapaingotry ny pôlisy, teo amin’ny sakana hiditra an’Andapa. Nosamborina avy hatrany izy ireo, ary nentina natao famotorana. « Fantatra fa novelesin’ity olon-dratsy tamin’ny hazo ny lohan’ilay lehilahy ka izay no nitarika ny fahafatesany. Rehefa hitany fa maty ilay olona dia lasa nitsoaka nankany Andapa izy sy ny sakaizany ka izao voasambotry ny pôlisy izao. Mbola eo am-panaovana fanadihadiana ny pôlisy ao Andapa » hoy ny vaovao.
m.L
