Ny marainan’ny alarobia tokony ho tany amin’ny 2 ora, notafihana bandy miisa hatrany amin’ny 15 any ho any ny tokantrano iray teny Mahabo Andohoranofotsy. Tena nahery vaika ity fanafihana ity, araka ny vaovao voaray. Talohan’ny namakian-dry zalahy ny trano dia nopoizininy ny alika ka maty tamin’izany ny efatra. Rehefa izany dia niditra an-keriny ireo olon-dratsy ary nalainy avokoa izay zavatra azony nentina, toy ny télé, ordinatera, subwoofer misy baffle efatra, mini-chaîne, kiraro maro ary ny akanjo sy poketra. Ny vaovao hatrany no nahalalana fa ny telo tamin-dry zalahy ihany no niditra ny trano, ny sisa kosa niandry tany ivelany. Ankoatra ny halatra dia saika naolan’ireto jiolahy ireto koa ilay ramatoa tompon’ny trano. Tsy dia salama laotra anefa izay io ka tsy nataony izany. Naharitra hatrany amin’ny adiny iray famataranandro ny fanafihana, na ny marina kokoa ny nijanonan’ireo jiolahy tao an-trano. Nandritra izany fotoana izany, tsy afaka nihetsika mihitsy izy telo mianaka fa dia nijery fotsiny izay nataon’ireo bandy.
r.s.
