Vitan’izy roa lahy tanteraka ny namaky ny trano amin’ny andro atoandro. Tsy nisy diany mety hamantarana azy ireo ary tena tontosa manara-penitra. Saingy ny tsy voakakin’ireto olon-dratsy ireto dia ny fisian’ny mpanara-maso teknolojika izay tsy nampoizin’izy ireo ny fisiany. Azo anaty rakin-tsary tsara izy roalahy manao taingi-droa avy namaky trano ka napetraka teo ampovoany ny fahitalavitra fisaka izay kely lafo vidy. Hita hatramin’ny mariky ny moto, Kymco G5 manga izay nampiasaina tamin’ny vaky trano sy ny fitaterana izay azo. Nanao kasikety fotsy izy roalahy ary ny iray izay mpanamory ny moto dia nanao sarom-bava na dia migaigaina be aza ny masoandro. Efa endrika iray izany fa olona manafina endrika izy. Ilay faharoa indray hita mazava ny tarehiny ary efa nohazavaina tamin’ny solosaina ka naparitaka eraky ny tambajotra sosialy sy ny afisy eny amin’ny biraon’ny mpitandro ny filaminana. Namoahana filazana fikarohana manerana ny nosy ireto mpamaky trano tetsy Andoharanofotsy ireto ary ny zandary no misahana ny fanadihadiana mahakasika izany. Mirongatra ny mpamaky trano sy ny hala-botry rehefa ankatoky ny fety toa izao. Toe-javatra izay tsikaritra izany isan-taona ary eo no mila ny fahamailovan’ny tsirairay, indrindra ireo izay hamonjy alim-pandihizana sy fety ny alin’ny farany taona. Eo koa no tena manararaotra ny olon-dratsy izay matetika efa mitsikilo mialoha ary manapoizina ny biby mpiandry tanàna. Dikan’izany, mila mailo mitsirika koa ny tompon-trano raha misy olona mihaodihaody na lava maso rehefa mivoaka sy miditra ny trano. Farany, ilaina hatrany ny manana ny laharan’ny mpitandro ny filaminana akaiky indrindra, izay miadidy ny boriborin-tany na ny fari-piadidiana misy ny trano fonenana. Mailo aloha izay vao…mifety.
D.R
