Taxibe iray mampitohy ny renivohitra sy Andoharanofotsy no nandratra olona teny Mandrimena omaly hariva teo, noho ny fahamaizana. Olona efatra no naratra tamin’izany, izay nahitana mpandeha an-tongotra iray sy mpitaingina moto telo mianaka. Nentina namonjy toeram-pitsaboana noho ny ratra nahazo azy ireo olona efatra ireo.
Araka ny fitantaran’ireo nanatri-maso dia nikasa hihodina an-dàlana ity fiara fitateram-bahoaka ity. Teo am-pihodinana, tsy nijery ny manodidina azy izy, no voadoana ilay mpandeha an-tongotra ary mbola nifatratra tamin’ilay moto nandeha tsara ara-dalàna. Nitangorona avy hatrany ny olona ary namonjy ireo naratra. Nisy koa anefa ny niantso ny polisy avy hatrany nijery ity loza ity. Tsy afa-nitsoaka ny mpamily sy ny mpanampy azy ka notanana hanaovana fandihadiana. Toe-javatra izay miverimberina sy mampitaraina ny mpandeha ny ataon’ny taxi-be tahaka izao. Efa nisy ihany ireo voasazy saingy miverina manao ny fandikan-dalàna, indrindra ny fihodinana an-tapa-dalana, ny fanariana mpandeha sns. Misy ny tompon’andraikitra afaka mandray an-tanana izany ka miantso azy ireo mba hijery akaiky ny toe-javatra tahaka izao ny mpanjifa.
Yv Sam
