Tsy vitan’ny indray na indroa fa efa imbetsaka no nampiharan’ity tovolahy iray ny filàn-dratsy ity zazavavy kely 6 taona ity, tao amin’ny tanana antsoina hoe Morarano, kaominina Andoharanofotsy, distrikan’Avaradrano. Potika tanteraka ilay zazavavy, raha ny fampitam-baovao azo, rehefa nataon’ireo mpitsabo ny fitsirihana azy. Ny tena loza, hoy hatrany ny fanazavan’ireo mpanao famotorana dia efa imbetsaka tokoa no niharan’izay fanolanana izany ilay zazavavy ary tao amin’ny lavam-pitombenany no nopotehan’ilay tovolahy. Hatramin’izay, hoy hatrany ny vaovao dia tsy sahy nandaza tamin’ny ray aman-dreniny ilay lasibatra noho ny tahotra ilay nahavanon-doza. Voarahona foana mantsy ity farany hany nihafy teny hatrany. Nisy fotoana anefa, tsikaritra ihany ny zavatra nanjo ity farany ary tapa-kevitry ny hitondra azy any amin’ny tobim-pahasalamana ireo ray aman-dreniny. Fantatra teo ny zava-doza nahazo ary niteny izay nahavita izany taminy ihany ilay zazavavy nony farany. Nandray andraikitra avy hatrany ny zandary, vantany vao voapetrak’ireo ray aman-dreniny ny fitoriana. Natao avy hatrany ny fisamborana ilay tovolahy 16 taona, izay tsy dia nanano sarotra loatra. Niaiky izay zava-dratsy vitany rahateo ity farany. Marihana fa efa natolotra ny Fampanoavana ity raharaha ity, ary mazava ho azy, tsy nisalasala ny mpitsara mpanao famotorana, nandefa ity tovolahy ity, ho eny amin’ny fonjan’Antanimora, miandry ny fotoam-pitsaràna. Tsy misy tandroka tokoa ny ratsy. « Mila hafamisina ny fanaraha-maso ny zanatsika ireny amin’ireo tranga mety hahazo azy » hoy ny zandary.
m.L
