Ny 25 aogsitra 2017, tamin’ny 10 ora maraina lasa teo, no notokanana ny « Poste de Police Avancé” ny polisim-pirenena eny amin’ny Fokontany Manantenasoa eny amin’ny Akamasoa Andralanitra. Nanatanteraka izany teny an-toerana ny tomponandraikitra avy ao amin’ny minisiteran’ny Filaminam-bahoaka, ny Tale jeneralin’ny Polisim-pirenena ny contrôleur général de Police Eric Michel Idrissa izay nisolo tena an’Andriamatoa minisitra. Navohitry ny tale jeneraly tamin’ny lahateny fohy nataony fa ny fametrahana ny filaminana dia andraikitry ny tsirairay ka tokony hisy ny fifanomezan-tanana. Anisan’izany ity fanokafana Poste de Police Avancé eny an-toerana ity noho ny fahamaroan’ny olona tonga tsy fanta-pototra sy ireo izay mifamezivezy eny. Izao fanokafana toeram-piasana vaovao izao dia tafiditra indrindra ao anatin’ny ezaka ataon’ny Polisim-pirenena ho fisorohana ny asan-jiolahy ary ho fanakaikezana kokoa ny vahoaka eny anivon’ny fokontany.
T.M.
