Nandriaka indray ny rà tetsy Andravoahangy ambany, ny alin’ny zoma hifoha sabotsy lasa teo. Lehilahy iray no namoy ny ainy teo ho no eo rehefa voahitsaky ny kamiô teny an-toerana. Potsitra sy potika tanteraka ny tapany ambany, izay voatetin’ny kodiaran’ilay fiarabe navesatry ny entana nentiny. Tsy nisy azo natao intsony taminy, eny fa dia niezaka namonjy ihany aza ireo nanatri-maso. Hatreto dia mifamahofaho be ihany ny antony nahatonga ny loza sy ny nahatonga ity lehilahy ity ho tany ambanin’ilay fiarabe. Voalazan’ireo nanatri-maso mantsy fa hoe saika hangalatra « charbon », entana izay nentin’ity fiarabe ity io olona voahitsaka io. Nihanika teny ambonin’ilay fiarabe izy ary saika hitsambikina niaraka tamin’ilay entana no voarain’ny kodiarana, ary io voahitsaka io. Loharanom-baovao hafa indray milaza fa karazan’ireo mpitaona entana, miandry ny fiavian’ireo fiarabe tonga alim-be eny an-toerana izy io no izao niharan-doza izao. Ny zavatra hita aloha, dia nisy gony « charbon » iray teo akaikiny, izay niara-voahosy taminy. Taorian’ny loza moa, dia tonga avy hatrany teny an-toerana nandamina ireo olona efa nanomboka nitangorona ireo mpitandro filaminana misahana iny toerana iny sy ireo pôlisy misahana ny lozam-pifamoivoizana nanao ny fizahana ifotony. Ny razana kosa, dia efa nentina tany amin’ny tranom-paty. Efa mandeha moa ny fanadihadiana mahakasika ity tranga ity.
m.L
