Mbola nitrangana lozam-pifamoivoizana ihany koa tetsy Andravoahangy ambany omaly maraina. Lehilahy iray mpitondra sarety no torana tsy nahatsiaro tena rehefa avy nofaohin’ny “taxi-be” iray mpampiasa iny làlana iny. Omaly maraina manodidina ny tamin’ny 5 ora sy sasany eo no nitrangan’ny loza raha ny fitantaran’ireo nanatri-maso. Raha ny fantatra dia andeha hitatitra entan’olona vao maraina io tovolahy io no voafaokan’ilay “taxi-be” avy any aoriany. Marihina fa nipitika lavitra mihitsy ity tovolahy ity, tokony teo amin’ny 5 metatra eo, vokatry ny hamafin’ny dona nahazo azy. Vokany : tapaka ny tongony havia ary mivonto be araka izany ny feny. Maratra daholo ihany koa ny vatany, kiakan’ny arabe. Tsy afa-nandeha intsony ity farany noho ny fahavoazana nahazo azy fa ny olona nandalo sendra nahita ny zava-nitranga no nampiantso ny polisy izay nandrindra ny fifamoivoizana tsy lavitra teo. Ity farany no nandray an-tànana ny raharaha ary nanaraka ilay marary sy ilay mpamilin’ilay “taxi-be” hatreny amin’ny hopitaly.
Niony H.