Raikitra ny fifampitifirana teo amin’ny jiolahy sy ny polisy. Nifanenjika ny roa tonta rehefa tsikaritry ny polisy iray avy namita iraka ka nahatsikaritra jiolahy naka tamin-kery ny moto nentin’ny olona iray. Nampandre ny namany ny polisy ary napetraka ny paikady. Raikitra ny fanenjehana ireo jiolahy nandeha moto halatra, niainga teo Andohatapenaka izany. Toa ireny amin’ny horonan-tsarimihesika ireny ny kisarisary saingy tsy taiza izany fa teto an-drenivohitra. Tsy nanaiky nijanona mihitsy ny jiolahy nandritry ny kilaometatra maro. Tonga hatrany Ambohitrimanjaka izany. Nikasa ny nandeha tamin’ny lalana Andriantany izay mihazo an’i Mahitsy ny olon-dratsy ary rehefa hitan’izy ireo fa tena akaiky ny polisy dia najanony ny moto. Saingy navoakany kosa ny basy ary tsy nisalasala ny nitifitra ny polisy nanenjika izy ireo. Fahasahiana tsy roa aman-tany ary toa ny manao vy very ny aina mihitsy. Teo dia nifampitifira ny roa tonta ary tao anatin’izany no lavo ny telo tamin’ireo jiolahy.
“Mbola nahitana sabatra lava lela teny ihany koa teny aminy Marihina fa moto miisa roa halatra avokoa no nentin ‘ izy ireo nitsoaka izay efa azo ka tafaverina amin ‘ ny tompony”, raha araka ny fanampim-panazavan’ny polisy. Mampiasa basy ary tsy misalasala ny nitifitra, eny fa na dia mpitandro ny filaminana aza. Raha olon-tsotra izany no nifanehatra tamin’ireo dia mazava hoazy fa tena tsy afa-nanao na inona na inona. Miady aman’aina hatrany ny mpandeha kodiaran-droa raha vao hariva ny andro. Sady miady mafy amin’ny lozam-pifamoivoizana no izao koa miady mafy amin’ny jiolahy mitam-basy. Soa fa lavo aloha ireto telo ireto.
D.R
