Tovolahy 34 taona no namoy ny ainy tany Seaford, tanàn-dehibe iray ao atsimon’i Angleterre. Mipetra-drery izy ary fanaony matetika ny milomano an-dranomasina, manamorona izany rahateo ny toeram-ponenany. Ny 24 aogositra teo dia nilomano toy ny fanaony izy ary nanomboka teo no tsy hita. Tsy nisy nahatsikaritra izany satria izy rahateo dia mipetra-drery, raha araka ny fanazavana azo tamin’ny fianakaviany. Ny manodidina azy no nahita fa tsy tao an-trano mihitsy izy efa ho andro maromaro. Niantso ny fianakaviany ireo ary teo dia nanome alàlana iretsy voalohany ny hamohana ny tranony avy hatrany. Tsy tao ilay tovolahy ary nilamina tsara ny tranony. Ny findainy koa dia hita soa aman-tsara tao amin’ny efitranony. Nanomboka teo no natao ny fikarohana ary izy efa natsingevan’ny ranomasina no hita. Nanaovana fitsirihana ny razana ary mbola handrasana ny valin’izany. Nalevina omaly teto an-drenivohitra ny lavenon’Itompokolahy rehefa tonga ny alatsinainy teo tamin’ny fiaramanidina.
D.R
