Hatairana ny an’ireo mponina tany amin’iny distrikan’Anjozorobe iny, omaly maraina. Fatin-dehilahy iray, efa lo, tsy misy tanana sy maso intsony no hitan’ny fokonolona tao Antetezana, fokontany sy kaominina Anjozorobe. Araka ny fampitam-baovao azo avy any an-toerana dia olona sendra nandalo teo amin’ilay toerana no naheno fofona hafahafa avy tamina kirihitr’ala tao amin’io faritra io. Niezaka nijery izany ilay olona ka akory ny hatairana raha nahita ity fatin’olona efa simba tanteraka. Niantso avy hatrany fokonolona ireo nahita. Tonga teny an-toerana ihany koa ireo zandary avy ao amin’ny tobi-paritra niaraka tamin’ny mpitsabo. Tamin’ny fizahana ny razana, hoy hatrany ny fanazavàna azo no nahafantarana fa lehilahy manodidina ny 20 ka hatramin’ny 26 taona eo ho eo izy io, ary efa maty tokony ho dimy andro tany ho any. Hatreto dia mbola tsy fantatra aloha ny antony nahatonga ny fahafatesana, fa raha ny vinavinan’ireo tompon’andraikitra teny an-toerana dia hoe mety ho nisy namono tany ho any, ary natsipy tao amin’io kirihitra io ny razana avy teo. Marihana, fa tsy fantatra na iza na iza io lehilahy hita faty io. Tsy misy mahafantatra ny akanjo teny an-kodiny ireo mponina, moa tany aminy tsy nisy azo taratasy manambara ny momba azy. Ambonin’izay, ny razana efa potika tanteraka ka tsy fantatr’endrika intsony. Taorian’ny fizahana moa dia nentina nihazo ny tranom-paty tany an-toerana ny razana. Misokatra ny fanadihadiana ataon’ireo tompon’andraikitry ny filaminana, mahakasika ity raharaha ity.
m.L
