Saron’ny zandary avy amin’ny borigadin’Anjozorobe, kaompania “Imerina Central” ny herinandro lasa teo ny basy “mas 36” iray, tao Ambodivala, Ambohibary Vohilena. Olona dimy no voarohirohy tamin’ity fitazomanana basy tsy ara-dalàna ity, ka ny roa tamin’ireo no nalefa eny Tsiafahy, ny telo kosa miandry ny fotoam-pitsaràna azy ao Antanimora. Raha ny fanazavana azo dia tamin’ny alalan’ny fanomezam-baovao no nahafantarana ny fisian’ny olona mitazona basy, izay marihina fa tsy azon’olon-tsotra entina. Nidina teny an-toerana taorian’ny fahazoan-dalàna ary nananteraka fisavàna ny zandary ka tamin’izany no nahatratrarana ity fitaovam-piadiana ity. Ity farany, araka ny loharanom-baovao, dia hampanofaina amin’ny jiolahy na dahalo, na entin’ireo olona ireo manantanteraka fanafihana mihitsy. Noraisim-potsiny tany Marovazaha, Bongatsara, Ambohimandroso ary Ankazongoaika ireto olona ireto, izay nanambara tao anatin’ny fanadihadiana azy ireo fa hoe mpividy fotsiny ihany. Mbola an-dalam-pikarohana ny tena loharano niavin’ity fitaovam-piadiana ity, araka izany, ireto mpitandro filaminana ireto. Natolotra avy hatrany ny Fampanoavana izy dimy lahy ireto, ka io nalefa any am-ponja vonjimaika io.
m.L