Raim-pianakaviana iray no namoy ny ainy tao anatina lozam-pifamoivoizana omaly tany amin’iny distrikan’Anjozorobe iny. Môtô roa no nifandona tamin’izany.
Tsena ny andro omaly tany an-tampon-tanan’Anjozorobe. Fanaon’ireo olona avy any ambanivohitra no miakatra ao an-tampon-tanana araka izany, mamonjy izany tsena izany. Anisan’izany ireto mpivady, izay niaraka teny ambony kodiaran-droa. Indrisy anefa, fa tsy tafaverina intsony tany amin’ny tanana nisy azy ity raim-pianakaviana iray niaraka tamin’ny vadiny. Marihana, fa nitondra kodiaran-droa izy ireo ary teny an-dalana, teo amin’ny fokontany Ambohimijery, kaominina Ambongamarina izy ireo no niharan-doza. Somary tery ny lalana ary misy fiolanana. Izany hoe tsy mifankatazana mihitsy ireo izy hifanena. Tamin’io fotoana io anefa, araka ny fampitam-baovao avy any an-toerana, no nisy taxi-moto iray nirafarafa avy any, tsy nahita mihitsy azy mivady ireto. Handeha hianavaratra haka olona any an-toerana izy io, raha ny fantatra ary somary nandeha mafy. Ireto mpivady ihany koa, tsy nanam-po velively ny fiavian’ilay môtô avy any. Tsy tana intsony araka izany ny fifandonana teo amin’ny roa tonta; izay mafy dia mafy tokoa. Raha ny vaovao hatrany dia samy naratra na ilay tovolahy nitondra ilay taxi-moto nandona na ireo olona roa voadona. Ilay rangahy niaraka tamin’ny vadiny kosa no voalaza fa tena voa mafy, satria dia nahitana fahavakisana tao amin’ny lohany. Nentina niakatra, namonjy toeram-pitsaboana tao Anjozorobe araka izany ireto naratra ireto. Ilay tena voa mafy kosa no tsy maintsy nentina niakatra taty an-dRenivohitra noho ny haben’ny fahavoazana nihatra taminy. Indrisy anefa, fa vao nigadona teto izy dia namoy ny ainy. Nidina tany an-toerana nanao ny fizahana ifotony moa ireo zandary tompom-paritany any an-toerana. Efa notazonina rahateo ilay tovolahy nandona, saingy aorian’ny fitsaboana azy vao azo hadihadiana hoy ny fanazavana azo.
m.L