Nihosin-drà tokoa ilay ramatoa niankohoka teo amin’ny tany izay heverina fa nahita ny endrik’ilay jiolahy iray sisa tao an-trano. Ny marainan’ny alakamisy teo no nanafika tao an-tokantranon’izy 3 mianaka ireto mpamaky trano rehefa avy nanapitsoka ny « grille de protection » teo am-baravarakely
Maromaro ireo mpangalatra no nanao ny asa ratsiny ka ny sasany niandry tety ivelany ary ny iray kosa nibata sy namoaka ny entana . Efa tafavoaka tamin’izany ny fahitalavitra, ka teo am-pibatana indrindra ny zava-maneno no henon’ny tao an-trano fa tafiditry ny jiolahy ny tanàna. Niezaka nitsangana moa ity ramatoa mpiandry no sady nandroaka devoly tamin’ireto jiolahy. Nifanehatra tamin’ity farany teo amin’ny lalantsara anefa ity ramatoa tompon-trano, ka avy hatrany dia noleran’ilay mpanafika tamin’ny antsy ny ilany havia, sady nanao tari-dositra ilay lehilahy tratrany tao anefitrano fandraisam-bahiny . Nidaraboka tamin’ny tany ity renim-pianakaviana, ka niboiboika ny rà nameno ny trano. Nikoropaka ny tao an-trano ka ny iray namonjy ity reniny fa ny zanany iray kosa niantso vonjy tamin’ireo mpiara-monina manodidina. Tsy fantatra aloha na noho ny tahotra fa dia efa ora maromaro taty aoriana vao nisy sahy nivoaka nanampy sy nanontany izay zava-nitranga.
Tsy tana moa ny ain’ity ramatoa noho ny fahaverezan-drà be loatra nahazo azy sy noho ny hataran’ ny fizahana natao azy. Efa mandeha moa amin’ izao fotoana izao ny famotorana amin’izay mety ho nahavita ny heloka.
