Anisan’ny miha-mahazo vahana eto amintsika ny fandrasaina zava-mahadomelina mahery vaika. Ny herinandro lasa teo, dia mpitsindrona « heroine » dimy lahy no voasambotry ny polisy, teny amin’iny faritra Ankasina iny. Mbola tratra teo am-panaovana izany mihitsy moa izy ireo, raha nigadona tao an-tranon’izy ireo ireo mpitandro filaminana. « Tamin’ny alalan’ny angom-baovao azon’ny polisim-pirenena no nahalalana, fa misy olona maromaro ao amina tokantrano iray eny Ankasina mitahiry zava-mahadomelina. Nidina teny an-toerana ny polisy ka rehefa niditra tao amin’ilay trano dia lehihaly 5 no hita tao ary mbola teo am-pitsindronana heroine niaraka tamin’ny fitaovana fanaovana izany » hoy ny voalazan’ny tatitra azo avy amin’ny polisim-pirenena. Teo no ho eo ihany moa dia nosamborina izy ireo ary nentina nihazo ny biraon’ny polisy mba hofotorona. Marihana, fa vovo-drongony mahery vaika milanja eo amin’ny 2 grama eo sisa hita tany amin’izy ireo, ambin’ny efa avy nampiasain’ireo dimy lahy ireto. Ny fanontaniana mipetraka dia hoe : avy aiza izy ireo no nahazo ity rongony mahery vaika ity ary iza no mpamatsy azy ? Efa an-dàlam-panaovana fanadihadiana mahakasika izay moa ireo tompon’andraikitry ny filaminana. Izy dimy mirahalahy kosa, natolotra ny Fampanoavana ny faran’ny herinandro teo ary fantatra, fa nadoboka am-ponja vonjimaika eny Antanimora, raha ny voalazan’ny tatitra hatrany.
m.L
