Teny amin’iny faritra Ankatso sy ny manodidina iny, raha teo am-panaovana fisafoana ireo pôlisy avy etsy amin’ny kaomisarian’Ambohijatovo, ny alatsinainy lasa teo, no nahatratra tovolahy iray, teo am-pamaiana fiaran’olona mihitsy. “Tsikaritra tamin’izany fa mailomailo izy nivoaka ny fiara izay nijanona teo amoron-dalana ary nitondra « auto-radio » tamin’izany. Manoloana izany dia nosakanana avy hatrany izy ary rehefa nohadihadiana izy dia fantatra fa tsy azy ilay fiara nangalany io « auto-radio » io” hoy ny fampitam-baovao. Tamin’io fotoana io ihany dia nosamborina ranamana ary nentina nihazo avy hatrany ny kaomisaria ho an’ny famotorana. “Niaiky moa izy fa novakiany ilay fiara ka nahazoany an’io kojakojam-piarakodia io” raha ny vaovao azo avy tamin’ny pôlisy hatrany. Efa natolotra ny Fampanoavana omaly ihany moa ity tontakely ity ary fantatra fa naiditra am-ponja vonjimaika. Akaiky tokoa ny fety, manararaotra ihany koa ireo olon-dratsy, saingy tsy afa-bela amin’ireo mpitandro filaminana foana.
m.L
