Misy valan’aretina hafahafa mandripaka olona maro, tsy hay hoe « tazomahery », satria mbola tsy voafaritra mazava tsara hatramin’izao, any amin’ny Kaominina Ankililoaka distrikan’i Toliary II. Raha ny loharanom-baovao dia efa hatramin’ny fotoanan’ny ranobe iny no nitranga voalohany ny aretina, ary tsy latsaky ny telo isan’andro amin’izao ny maty. Fokontany maromaro no tena lasibatra : toa an’Ambararatafaly, Andranondava, Amboboky, Antanilehibe, Anteteza ary Tranolahatry. Ireo ankizy madinika sy tanora no tena lasibatr’ity valan’aretina ity. Raha ny fitantaran’ny mponina any an-toerana amin’ny fitrangan’ny aretina amin’ny ankapobeny. Mivonto haingana dia haingana ny ratsam-batan’ny marary, avy eo manopy mavo ny hoditra sady mitaraina marary mafy ao amin’ny hazon-damosiny. Tsy ampy adiny iray dia tsy afa-mitsangana intsony ny marary. Raha tsy voatsabo ara-potoana dia mamoy ny ainy avy hatrany.
Tazomoka mahery. Raha ny fanazavan’ny mpitsabo tsy miankina iray miasa any an-toerana, dia karazana tazomoka mahery no mitranga ary ny tsy famonjen’ny mponina ara-potoana tobim-pahasalamana no mahatonga ny firongatry ny aretina malaky. Nomarihan’ity mpitsabo ity fa tsy manam-bola ahafahana mamonjy mpitsabo ny maro amin’izao fotoanan’ny maitso ahitra izao, ary efa mihombo be ihany koa ny aretina vao mihazakazaka mamonjy dokotera ny mponina. Noho ny tsaho miely fa « lolo » na « angatra » no mamafy ny aretina tsy fanta-pototra. Manao fehy lamba mainty eo amin’ny tanany havia sy ny tongony havia avokoa ny ankamaroan’ny olona ho antoka tsy hahazoana ilay aretina, noho ny baikon’ny ombiasa.
Eric Man