Lehilahy iray, 54 taona no voalaza fa tompon’antoka tamin’ny herisetra ara-nofo nihatra tamin’ity ankizivavy ity. Voatery nosamborin’ny zandary, ny voalohandohan’ny volana teo, tao Vinany, distrikan’i Mandoto. Androm-pamadihana tokoa ny amin’izao. Fotoan-dehibe tokoa, famoriana ny fianakaviana, indrindra moa any amin’iny faritra Vakinankaratra sy ny manodidina. « Bal » be mandra-maraina, miaraka amin’ny vary be menaka sy ny bapampa ary ny zava-pisotro isan-karazany. Fotoana fanararaotan’ireo olon-tsy vanona ihany koa, indrindra fa ny alina. Toy ity nitranga tao Ambohitrandriana, tao amin’ny kaominina Vinany, ny alin’ny 31 hifoha 1 jolay lasa teo. Ankizivavy iray, vao 13 taona monja no niharan’ny fanararaotana ara-nofo nandritra ny lanonana tao an-toerana. Efa nahavita ny asa ratsiny ilay mpanolana fa hitan’ny ray aman-drenin’ilay zaza ny nihatra taminy. Nanamafy rahateo ny mpitsabo fa tena niharan’ny fanolanana ity ankizy ity. Nametraka fitoriana avy hatrany ireo ray aman-dreniny ary niantefan’ny ahiahy tamin’izany io lehilahy 54 taona io, izay tsy iza, araka ny fampitam-baovaon’ny zandary fa andahin-dreniny ihany. Efa natolotra teny anivon’ny Fampanoavana moa ingahirainy ity ary tsy nisalasalàna ny fanapahan-kevitr’ireo mpitsara mpanao famotorana : fampidirina am-ponja vonjimaika, miandry ny fotoam-pitsaràna azy. Tsiahiviana fa tany Faratsiho ihany koa dia efa nisy tranga fanolanana tahak’izany nandritry ny androm-pahamadihana ihany koa. Zaza vao roa taona monja indray tamin’izay no lasibatra ary noahiahiana ho nahavanon-doza ny rainy, izay mamo tamin’izay fotoana izay.
m.L
