Nitrangana hain-trano goavana tetsy amin’ny fokontany Ankorondrano Andrefana, ny alin’ny zoma hifoha sabotsy lasa teo. Araka ny tati-baovao navoakan’ny kaominina Antananarivo Renivohitra dia trano hazo, mitafo fanitso miisa enina no levon’ny afo. Ankoatr’ireo dia mbola nisy fiara miisa roa nipetraka tsy lavitra ity firehetana ity ihany no may. Tao anatin’izany loza mahatsiravina izany anefa dia tsy nisy aina nafoy na ny naratra, raha ny vaovao azo hatrany.
Tamin’ny roa ambinin’ny folo alina latsaka fahefany teo no nahazo antso ny sampana mpamnjy voina tetsy Tsaralalàna, izay avy hatrany dia nidina teny an-toerana, izay nampian’ireo mpamonjy voina tetsy Andravoahangy. Adim-pamantaranandro iray mahery kely teo no nilain’ireo mpamonjy voina, nentina nahemehezana tanteraka ny afo ary nahafaty tanteraka izany hain-trano izany. Vetivety ihany koa dia voafehy ny afo izay nihitatra tamin’ireo fiara teo amin’ny manodidina. Raha ny fampitam-baovao hatrany dia iray tamin’ireto nirehitra ireto ihany no toeram-ponenana, ny ambiny dia saika trano fiasàna ary trano fitehirizan’entana (fanatobiana fako plastika). Hatreto aloha, tsy fantatra mazava izay tena antony niandohan’ity famaizana goavana ity. Efa am-panaovana ny fanadihadiana mahakasika izay ireo tompon’andraikitra.
Tsiahivina fa vao herinandro teo ihany koa izay no nisiana trangana hain-trano goavana teto an-drenivohitra. Trano hazo miisa 17 no indray ravan’ny afo tetsy Andavamamba.
m.L
