Nisehoana fanafihan-jiolahy ny teny Anosibe ny alin’ny alakamisy lasa teo. Araka ny fantatra dia niisa dimy izy ireo, samy nirongo basy avy, saika hanafika mpivarotra iray teny an-toerana. Ny efatra tamin’ireto olon-dratsy dimy ireto no niandry tety ivelany. Nanao amboletra niditra tao an-trano kosa ny iray. Raha ny fanazavana nomen’ny mpitandro filaminana dia efa nahatsikaritra ny fihetsik’ireto olona nihaodihaody teo am-baravarana izy ireo. Raha vao nahita izany ireo namany dia nitsoaka nandositra. Naheno izany ihany koa ny tompon-trano, raha ny filazan’ireo olona nahita ity tranga ity ka taitra sy niezaka nisambotra ilay iray efa tafiditra tao an-trano, izay efa noraisim-potsiny. Efa nanomboka nitangorona ihany koa ny fokonolona. Nentin-katezerana loatra tamin’ny fisesisesin’ny asan-jiolahy tato ho ato izay. Efa raikitra ny vono sy daroka isan-karazany. Efa nandeha mihitsy aza ny feo teny an-toerana fa hodorana ity olon-dratsy tratra am-bodiomby ity. Saingy voasakan’ny mpitandro filaminana izany. Marihina fa tsy mbola nahazo na inona na inona ity jiolahy ity. Mitohy ny fikarohana ireo namany hafa tafapotsisaka.
m.L
