Mora kokoa ny mamantatra ny olon-dratsy rehefa mifangaro amin’ny fiarahamonina ny mpitandro ny filaminana. Mbola voaporofo indray izany tetsy Anosibe rehefa sarona teo am-panatontosana fanendahana ireo olon-dratsy. « Mian-dahy sy miam-bavy ireo mpangarom-paosy na mpanendaka izay voasambotra. Ny polisy izay avy eo anivon’ny SAG no tompon’antoka tamin’ny fanaraha-maso sy ny fidinana an-tsehatra », raha araka ny sampan-draharahan’ny serasera eo anivon’io vondrona io. Tao anatin’ny iray andro monja no nahazoana ireo dimy mianadahy ireo. Raha fanendahana no nataon’ireo telo lahy, ireo vehivavy kosa dia sarona teo am-pangaromana paosin’olona mpiantsena. Mahomby hatrany ny asa mangina ataon’ireo polisy manao fanamiana sivily eto an-drenivohitra. Tsy ampoizin’ny mpanao ratsy ny fisian’izy ireo, indrindra eny amin’ny toerana be olona. Mila haparitaka hatrany izy ireny eny amin’ny boriborin-tany maro eto an-drenivohitra, indrindra amin’izao vaninandro fety izao.
D.R
