Jiolahy iray, 17 taona, no voasambotry ny polisy teny Anosibe, tao amin’ny faritra antsoina hoe Jamaika, ny alarobia 13 septambra tokony ho tamin’ny 8 ora alina, rehefa avy nanendaka raim-pianakaviana handeha hody eny an-toerana. Araka ny fanazavana dia efa-dahy izy ireo no nanao ny fanedahana. Ny iray mody nisongona ilay raim-pinakaviana. Ny telo kosa manaraka avy aoriana. Nobedain’ireto farany ilay raim-pianakaviana rehefa niditra elakelan-trano dia raikitra tamin’izay ny fandrobana. Lasa avokoa ny zavatra rehetra tao am-paosy, toy ny finday sy vola, ny kitapo iray misy solosaina enti-tanana. Rehefa izay dia nitsoaka daholo izy ireo. Niantso ny Polisy avy ao amin’ny boriborintany faha-5 ity niharam-boina ka natao ny velapandrika. Nisolo fitafiana ilay raim-pianakaviana dia nalefa nivoaka ka nahatazana ny iray tamin’ireo mpanedaka, izay nosamborina avy hatrany. Rehefa nosavaina dia tratra teny amin’ny ny « écouteur” tamin’ny findan’ ilay raim-pianakaviana. Mbola nahitana antsy lava koa teny aminy. Nampidirina am-ponja avy hatrany ity jiolahy ity rehefa natolotra ny fitsarana omaly.
T.M.
