Raikitra ny fifanjevoana teo amin’ny Zandary sy ireo malaso. Vokany ; Zandary iray no naratra voatifitra teo amin’ny sandriny. Taorian’ny fanafihana nataon’ireo jiolahy tany Anosikely no nisehoan’izany, ny alatsinainy maraina teo. Raha ny fampitam-baovaoa voaranay hatrany dia nirefodrefotra ny basy. Tany amin’ny fokontany Anosikely, any amin’ny kaominina Ambanivohitra Tsararano, disitrikan’i Maevatanàna no nitrangan’izany ny alahady lasa teo, tokony ho tamin’ny 09 ora alina, nirohotra nakany amin’io tanàna io ireo dahalo miisa 16 lahy nirongo basy toy ny kalaky sy basim-borina. Nanapoaka basy sady nitabataba izy ireo vantany vao tonga. Nizarazara nanampina ny varavaran’ireo tranony sasany, ary ny hafa kosa nandeha namaha ny vavahadin’omby. Saika hasesin-dry zalahy halaina ny omby rehetra teo an-tanàna. Tsy nahasahy nanohitra sy nivoaka ny tranony ny fokonolona, satria maro loatra ny basy teny an-tanànan’ireo jiolahy, ary tena nampiasainy ihany koa izany. Rehefa hita fa lasa ireo dahalo vao samy nivoaka tsimoramora isan-tokantrano ny olona sady nampandre ny mpitandro ny filaminana malaky. Nisy avy hatrany ny sakana nataon’ny Zandary tany amin’ny lalana kilaometatra vitsy tsy hidirana ny tanànan’i Tsararano. Raha vao nahatazana ireo Zandary teny ambony fiara tsy mataho-dalana ny malaso, tonga dia nitifitra avy hatrany. Rakitra ny fifanjevona teo amin’ny roa tonta. Vokany : nisy voan’ny bala ny iray tamin’ireo Zandary, izay voatiftra teny amin’ny sandriny. Voatery nitsoaka malaky ny mpitandro ny filaminana nanoloana izany, fa ireo jiolahy kosa mbola nanohy ny diany niaraka tamin’ireo omby noentiny. Fantatra fa omby manodidina ny 50 isa no lasan’ireo dahalo. Raha ny tati-baovao voaray hatrany kosa dia ny marainan’ny alarobia teo, vao samy nifamory ny fokonolona tao Anosikely hanohy ny fanarahan-dia.
Ratantely
