Ramatoa izay hamonjy fiangonana vao maraina ny andron’ny taom-baovao no niharan’ny lozam-pifamoivoizana. Teo Anosy no nitranga izany ary maty tsy tsa-drano ilay olona voadona. Mpianaka izy ireo no niaraka dia ilay ramatoa sy ny zanany lahy izay mbola kely. Ilay zaza mba tsy naninona nandritr’ity lozam-pifamoivoizana ity, saingy kosa hitany ny nahafatesan-dreniny. Ny « enjoliveur » izay latsaka teo an-toerana no nahafantarana ny marik’ilay fiara nandona. Ny lokon’ny fiara kosa dia tadidin’ilay zaza. Rehefa nakambana izany dia fantatra fa Fiat miloko mainty ny fiara nentin’ilay nahavanon-doza izay tsy nijanona fa nitsoaka avy hatrany ary navelany teo ny maty sy ny naratra. Mendrika ampiasaina avokoa ny sary noraiketin’ny « vidéosurveilance » rehetra izay misy amin’ny lalan’ilay fiara nitsoaka mba hamantarana ny laharany ka hahitàna ny mpamily nahafaty olona. Toe-javatra toy izany no tena isan’ny ilaina ireny fitaovana ireny hapetraka etsy sy eroa. Etsy ankilan’izay, mitady ho lasa fanaon’ny mpamily nahavanon-doza ny manao « délit de fuite » ankehitriny, indrindra raha amin’ny toerana tsy be olona. Izany dia mbola noho ny tsy fahampian’ny fitaovana fanaraha-maso ny fifamoivoizana hatrany.
D.R
