Fiara Sprinter iray no nivoaka ny lalana ary nivadika ambony ambany ka nifatratra tany ambany tamin’ny lalam-by, teny Avaratr’Ilempona Antanifotsy, amin’ny lalam-pirenena fahafito omaly tokony ho tamin’ny 2 ora sasany tolakandro. Olona enina naratra vokatr’izany, ka nahitana zazakely vao 5 taona monja. Nisy voa mafy tamin’ireo naratra ka nalefa haingana tany amin’ny hopitaly. Mba tsy nisy kosa ny aina nafoy tamin’ity loza ity. Raha ny fanazavana azo, avy namonjy lanonam-pianakaviana tany Imady ary hihazo an’Antananarivo io fiara io, ary mpianakavy miisa dimy rahateo no nentiny. Rehefa hiditra ny tetezana eo Avaratr’Ilempona dia nandona bisikileta nanao taingi-telo ilay fiara. Niezaka niala ka nahatana ny familiana ny mpamily ka nivarina tany ambany, izay misy ny lalam-by. Efa teny an-toerana ny mpitandro filaminana nizaha ity toe-javatra ity, nanao ny fanadihadiana sy nanampy tamin’ny fandefasana ireo naratra any amin’ny tobim-pitsaboana.
Efa taterina hatrany fa nisesy ny loza any amin’ny lalam-pirenena, ary indrindra amin’iny lalam-pirenena fahafito iny. Efa ho isan’andro ary maro ny ain’olona efa nafoy tamin’izany. Ireo fiara mpitatitra no tena tra-doza matetika amin’izany. Vokatry ny tsy fitandreman’ny mpamily, ny fandehanana mafy loatra mahatonga ny loza, hoy ny fanamarihana avy amin’ny DGSR. Nisy ny fanentanana ho an’ny mpamily amin’ny hitandremana indrindra rehefa mandeha amin’ny lalam-pirenena. Fotoan’ny fialantsasatra rahateo ary maro ny mihazo ny faritra, maro ny fiara mifamezivezy indrindra ny mpitatitra olona kasamy hitandrina ny rehetra. Ny mpamily izay iantefan’ny fanentanana izay miasa ao anatin’izany izay manaraka ny fepetra amin’ny tsy fandraisana alikaola, ny tsy fitondrana fiara rehefa reraka na tsy ampy torimaso. Eo ihany koa ny fanaraha-maso ny fiara alohan’ny iaingana. Ny lafiny mekanika ary ny fizahana ara-teknika eny anivon’ny sampan-draharaha misahana izany.
Yv Sam
