Saika isan’andro dia ahenoana fanafihana mitam-piadiana foana eto Andrenivohitra sy ny manodidina. Ny alakamisy lasa teo, mpivarotra iray indray no namoy ny ainy vokatry ny asan-jiolahy teny Antehiroka. Tsy ireo olon-dratsy mivantana anefa no namono an’ity ramatoa tompon-tsena ity ,fa ny aretim-po izay nahazo azy, taorian’ny nahalasa ny fananany nohariany tao anatin’ny taona maro, ary najifa tao anatin’ny indray mipi-maso monja, raha ny loharanom-baovao. Tokony ho tamin’ny enina ora hariva tany ho any no niseho ny fanafihana. Andian-jiolahy, toa hoe nirongo fitaovam-piadiana mahery vaika mihitsy no nanao amboletra tao amin’ity fivarotana ity. Naka izay azony rehetra ary lasa nony avy teo. Tsy nisy nampandre ny zandary teny an-toerana, fa siosion-dresaka ny maraina no nahenoan’izy ireo ny mahakasika ity fanafihana ity, raha ny fanazavana azo.
m.L
