Tsy zaza nesorina fa zaza nateraka mihitsy, raha ny fahitana ilay razana kely nifono tanaty “sachet” nisy nanary teny amin’ny fanariam-pako tao Antsirabe avaratra, omaly maraina. Efa ary avokoa mantsy ny maha olombelona azy ary tombanana ho teraka omaly maraina be ihany izy io. Niaraka tamin’ny tadim-poitra sy ny ahitra ilay zazavavikely tsy manan-tsiny. Midika izany fa nateraka mihitsy izy io. Mpitsindroka fako no nahita azy omaly maraina. Nihoraka avy hatrany ilay ramatoa raha vao nahita fa fatin-jaza kely no tao anaty harona plastika noraisiny. Taitra ny manodidina raha nandre izany ary nirohotra nijery ny zava nisy. Tsy nisy nahateny fa samy niantso tody ilay reny nahavanon-doza toy izao izay nahita. Tonga teny an-toerana ny BMH sy ny mpitandro filaminana nanao fizahana ny razana, fantatra fa nalevina eny am-pasam-bahiny ilay zazakely taorian’izany. Efa misokatra kosa ny fanadihadiana hitadiavana ilay reny nahavita izao habibina izao.
Andry N.