Fiara Sprinter iray avy nitondra olona hiteraka no voatifitry ny polisin’ny FIP omaly alarobia hariva tokony ho tamin’ny valo ora alina tao Tsivatrinikamo.
Nirefotra ny basy kalachnikov omaly alina tao Tsivatrinikamo, indroa ny fipoahana raha ny nambaran’ilay lehilahy niantefan’ny bala. Toy izao ny fitantaran’ilay lehilahy niharam-boina. Tokony ho tamin’ny 8 ora alina, nitondra ny anabaviny handeha hiteraka izy, efa maika fa aina no hovonjena ka nandrehitra ny jiro famantarana « détresse » . Rehefa nandalo teo amin’ny sakana fisavana fanaon’ny mpitandro filaminana anefa ity fiara dia tsy nijanona na dia nosakanana aza fa maika hamonjy ny hopitaly. Niverina ilay fiara Sprinter avy eo ka nijanona teo amin’ilay polisy misy ny sakana. Nanazava ny antony tsy nijanonany ilay mpamily. Samy niaka-peo ny roa tonta ka teo am-pamelomana ny fiara handeha ilay mpamily no avy hatrany dia namahana ny basy teny an-tanany ilay polisy ka nitifitra ny kodiarana, nivily anefa ny bala. Rehefa tafatsoaka ilay fiara dia mbola nitifitra ihany ilay polisy ka teo am-baravarana aorian’ilay fiara ny bala no niditra, namakivaky ny fiara ary niantefa tamin’ilay lehilahy teo anilan’ilay mpamily. Soa aloha fa tsy nahakasika ny vatany ny bala fa nandalo teo amin’ny tongony ka nandratra ny feny. Vokatry ny ratra nahazo azy dia mbola tazomina ao amin’ny hopitaly CHRR ity lehilahy ity tsaboina, tsy atahorana ny ainy. Nilaza kosa ny teo anivon’ny mpitandro filaminana fa mbola ao anatin’ny fanadihadiana tanteraka amin’izao fotoana. Tantara mitohy noho izany ity raharaha ity ka samy miandry izay ho tohony ny mpanara-baovao rehetra.
Andry N.
