Ny 18 mey 2014 vao mangiran-dratsy no nisehoan’ny lozam-pifamoivozana teo amin’ny RN34 (PK1O9+700) tao Dongavaohita. Teo amin’ny lala-mahitsy iray mivoaka ny tanàna no nandeha mafy ity fiara 4×4 Mitsibushi double cabine tsy mataho-dalana, tsy voatana intsony ny familiana tamin’ity fiara ka nivarina tany anaty hantsana.
Somary lalindalina ihany ity hantsana ity,satria mirefy folo metatra eo ho eo .Vokatr’izany fandehanana mafy izany dia nivadibadika ilay fiara ka lavidavitry ny arabe vao tafajanona. Olona 5 no tao anatin’ity fiara ity ka lehilahy iray 44 taona no maty avy hatrany, ny efatra ambiny kosa dia naratra mafy ary nalefa tany amin’ny hopitalin’ Andranomadio Antsirabe nomena ny fitsaboana sahaza azy ireo. Vao naheno izany ireo zandary dia nidina tany an-toerana niaraka tamin’ny dokotera nanao ny fizahana. Ny razana kosa dia efa nomena ny havany.Ampitandremina ireo mpamily ihany fa ny fandehanana mafy loatra matetika dia miteraka loza sy fahafatesana na koa fahasimbana eo amin’ny fiara izay mitera-doza toy izao.
ALEM
