Fikambanan’ny zanak’I Miraindraiky Antsirabe na FIZAMIA dia fikambanana iray mampivondrona ireo avy amin’ny faritra Atsimo-Antsinanana monina sy miasa eto Antsirabe. Azo ambara ho isan’ireo fikambanana tranainy indrindra izy ity satria efa tamin’ny taona 1989 no niforonany voalohany ary mbola voatazon’ireo taranaka aty aoriana ny fampandehanana azy tao anatin’izay 34 taona nisiany izay. Tsy miditra amin’ny resaka politika ny fikambanana fa natao hifampitsinjovan’ ireo mpikambana mivelona sy miaina eto na ankasoavana izany na ankaratsiana, izany rahateo ny antopisiany hoy Atoa Mamelomana Richard filohany. Ankoatra izany dia mandray anjara amin’ny fanentanana ireo tanora hiala amin’ny fidonanam-poana sy fandraisana zava-mahadomelina ny fikambanana ary isan-taona tsy diso anjara amin’ny fambolen-kazo iay ireo.
Mahatratra 51 fianakaviana ny mpikambana amin’izao ary entanina ireo izay te-hanatevin-daharana ny fikambanana hiditra ho mpikambana satria tsy mialon-jafy ny fikambanana. Isaky ny telo taona no atao ny fifidianana izay ho filoha ary indray isam-bolana kosa dia misy ny fivorian’ny raim-pianakaviana rehetra mpikambana hanaovana ny tatitra sy hifampizarana vaovao. Notontosaina ny faran’ny heriandro teo moa ny fifampiarahabana nataon’ny FIZAMIA teto Antsirabe.
Andry N.
