Ny sakaizany ihany no namadika azy, niditra am-ponja mihitsy moa ity lehilahy antsoina hoe Hery ity , nandritra izany no nanararaotra nivarotra ny fananana iombonan ‘izy roa ilay zakaizany ary nampiasa olona sandoka sy taratasy hosoka. Enim-bolana an-trano maizina tao Antanimora no sazin’i Hery, ny 23 jona 2020 izy no niditra am-poja ary ny 29 Desambra 2020 no nivoaka. Ny datin’ny 13 novambra 2020 anefa no natao ny « acte de vente » misy ny soaniany nohamarinana tao amin’ny kaominina. Niverina teto Antsirabe izy rehefa nahefa ny saziny ary nijery ny tranon’izy roa tao Ambohimena. Akory ny hatairany fa nilaza ny mpanofa ilay trano fa tsy azy intsony ny trano fa efa novidiana olon-kafa. Nametraka taratasy fanoherana » opposition » avy hatrany ilay lehilahy, akory indray anefa ny hatairany raha naheno fa misy raharaha hafa miandry azy indray ao amin’ny fitsarana mahakasika famindrana ilay trano na « homologation ». Nandeha ny famotorana ary fantatra fa ilay sakaizany no ao ambadiky ny zavatra rehetra. Tany Fenerive Est ity farany no voasambotry ny polisy noho ny resaka fisolokiana hafa koa. Naverina teto Antsirabe, nandritra ny fisavana azy no nahitana ny antontan-taratasy rehetra momban’i Hery tany aminy. Fantatra tamin’ny famotorana fa nataon’io sakaizany io antoka nakany vola tamina mpampanjanam-bola ny trano. Navadik’ity farany ho fampivarotana avy hatrany anefa izany raha ny fanazavana voaray na dia fantany izao aza fa sandoka avokoa ireo taratasy. Tsy afa bela tamin’ny famotorana ilay sakaizany nampiasa taratasy sandoka sy nanakarama olona hangala tsonia sy hisolo an’i Hery, nahiditra am-ponja avy hatrany moa izy roa niaraka tamina mpanera iray taorian’ny fitsarana azy ny 24 febroary lasa teo. Ankehitriny mivadibadika ny fandehan’ny raharaha satria misy ramatoa hafa mitory indray i Hery, milaza ity ramatoa ity fa natao varo-droa ilay trano, fantatra anefa fa tsy misy taratasy avokoa izany rehetra izany. Andrasana izay tohin’ny raharaha, ny hany fantatra dia tompona orinasa iray misehatra amin’ny fiambenana « securité » fanta-daza eto Antsirabe ity mpampan-jana bola voalaza etsy embony ity.
Andry N.
