Nahitana vokatra indray ny fisavana mahazatra fanaon’ny zandary avy amin’ny BPR eto Antsirabe, amin’ireo fiara mivezivezy amin’ny lalam-pirenena fahafito iny.
Sarona ny alarobia maraina tokony ho tamin’ny 7 ora, tao Vinaninkarena mantsy ny rongony telo gony niampy paraky gasy 30 kg. Lehilahy roa no voasambotra; izay marihina fa olona roa samy hafa ireo fa iray fiara fotsiny ihany. Nafatratra tanaty gony ny paraky gasy, raha natao tsara pirina tanaty koveta kosa ny rongony sahabo ho 50 kg, raha ny fanazavana avy amin’ny borigady hatrany. Tsy kely làlana tokoa ny ratsy, fa saika mahita hevitra hatrany ry zalahy hanondranana zavamahadomelina. Raha tazanina avy ety ivelany ireo entana hoy ny kaomandin’ny BPR , dia toy ireny entam-barotra hamidy ireny, hay rehefa nosavana dia rongony maro no nifatratra tao anatiny. Vaovao avy tamina olona tsara sitra-po no nahafantarana fa misy fiara mitondra rongony handalo ao , ka niainga tamin’izany ny fanadihadihana sy ny fisavana. Fiara mpitatitra iray avy any Toliary hoany Morondava, no nahitana ireto zavamahadomelina ireto. Nambaran’ny Lietna Lovasoa tompon’andraikitry ny serasera eo anivon’ny vondrontobim-pileovana eto Vakinankaratra, fa mivadika ho fandikan-dalàna ny fitondrana sy fivarotana paraky gasy, raha toa ka tsy nahazoana alàlana, ankoatra ny orinasa OFMATA .
Notsipihan’ny teo anivon’ny zandary, fa saika ahitana vokatra hatrany ny fisavana mahazatra fanaon’ny zandary amin’ireo fiaram-pitanterana mandalo eto Antsirabe. Raha tsiahivina mantsy, vao tsy ela akory izay no nitanterana teto ny fahatratrarana ireo jolahy fito nikasa hanafika tany atsimo, niaraka tamin’ny basy, taoVinaninkarena hatrany.
Andry N.
