Niakatra fampanoavana ary nidoboka ao amin’ny fonjan’Arivonimamo. Amin’ny 22 aogositra kosa ny fitsaràna azy. Nanome alàlana ihany ny lehiben’ny toby misy ilay miaramila zazavao ny amin’ny hisamborana sy hanaovana fanadihadiana azy. Raha tsiahivina dia voarohirohy ho naka an-keriny zazavavy 13 taona teny an-dàlana hianatra ity miaramila ity. Naolany teny amin’ny toerana mangingina nony avy eo. Tsy vitan’izay fa nitoe-jaza ilay zazavavy ary nanomboka teo ny fitsirihana ara-medikaly rehetra izay nanamafy ny fanahiana. Lavalava ny fizotran’ny fanadihadiana satria mbola mila alàlana avy amin’ny lehibeny izay vao azo henoina ny miaramila. Mbola mandalo an-tanan-tohatra anefa izany ary mba nivoaka ihany. Raha tsy niditra an-tsehatra ny depiote izay voafidy tao amin’ny distrikan’Arivonimamo dia mety mbola nitarazoka teo ny raharaha. Raha voaporofon’ny fanadihadian’ny fitsaràna fa tena io miaramila io tokoa no nahavanon-doza dia sady ho meloka ara-pitsaràna heloka bevava no meloka ara-pitsaràna miaramila io tanora zazavao io. Mandra-piandry ny fotoam-pitsarana azy dia mifonja ao Arivonimamo aloha ny tenany.
D.R
