Anio sabotsy faha-21 martsa no hanatanteraka fambolen-kazo eny amin’ny faritra Ambohidratrimo ny fikambanana mpanao asa soa « Association Miahy ». Zanakazo maherin’ny 2 000 no hasitrika amin’izany. Tafiditra indrindra ao amin’ny politikan’ity fikambanana ity izany zavatra izany.
Tamin’ny faha-11 novambra 2014 no nitsangana ity fikamnanana ity ary mahatratra hatrany amin’ny 42 000 ny isan’ny mpikambana ao aminy. Ahitana mpitsabo, mpampivelona, mpampianatra sy mpikambana tsotra. Hanampy ny mpiara-belona no tarigetran’izy ireo. Anisan’izany ny fampiterahana, fitsaboana marary, manao asa soa, mampianatra tenim-pirenena maro sy mandidy. Ao koa ny toerana misy famakiana boky ary ny tsy kely dia ny famolavolana tanora amin’ny fanomezana asa azy ireo. Izany rehetra izany dia maimaim-poana ka eny amin’ny faritra Amboaroy sy Ambohijanahary Antehiroka no misy ireo toerana anantaterahana izany. Anisan’ny hetsika voalohany notontosaina ny faha-8 martsa teo, andro iraisam-pirenena ho an’ny vehivavy. Nisy ny fanolorana sakafo tsy novidiana, nofonkena mitam-pihavanana sy carnaval.
Manana “centre medical” ry zareo, izay misy écographie, électrocardiographie, fanaovana vakisiny sy fizahana “tension. Ao koa ny centre d’accueil ho an’ireo mararin’ny homamiadana.
r.s.