Renim-pianakaviana iray 30 taona eo ho eo no hita faty novonoina tamin’ny fomba feno herisetra, ny 17 oktobra lasa teo, tany Tanandava-Bezaha, Distrikan’i Betioky Atsimo. Araka ny vaovao voaray dia nalaina jiolahy telo an-keriny tao an-tranony mamanton’alina ity vehivavy ity, ary notamperin’ireo tsy mataho-tody tamin’ny fomba feno habibiana ny ainy avy eo. Naraina ny andro vao samy taitra ireo mpifanila vodirindrina taminy nahita ny varavaram-be nivoha nidanadana kanefa tsy nisy olona tao an-trano, ka io no nanaitra ny rehetra nanao ny fikarohana. Ny alatsinainy maraina tokony ho tamin’ny 7 ora no nisy nahita teo amin’ny tetezan’i Sakondry 2km miala tsy dia lavitra ny tanàna ny fatin’ilay vehivavy. Raha ny loharanom-baovao dia valifaty noho ny kakay no nanamperana ny ain’ity ramatoa ity, satria tsy naka na inona na inona tao amin’ilay tokantranony ireo malaso. Manoloana ny zava-nitranga dia miverina mihorohoro indray ny mponina any Bezaha, raha nilamidamin-dratsy ny vono olona sy asan-dahalo taorian’ny fampiharana ny Dinabe.
Eric Manitrisa