Nitrangana vono olona tamin’ny fomba feno habibiana indray tany amin’ny Distrikan’i Betroka, Faritra Anosy, ny alin’ny zoma teo. Tovolahy mpivaro-mandeha iray, antsoina hoe : Njato (Lava Betsileo) avy any Imadin’i Kianja, Distrikan’ Ambositra, mila ravinahitra ao Jangany no hita faty nihosin-drà, afak’omaly naraina. Raha ny vaovao voaray, nisy namany naka an’ity tovolahy namoy ny ainy ity tao an-tranony, tokony ho tamin’ny valo ora alina. « Handeha hivoaka kely hisotro toaka izahay fa fety ny andro », hoy ity lehilahy niteny tamin’ny vadin’i Njato. « Tany anefa i Lava dia tsy niverina nody intsony, ka nikoropaka izahay nikaroka azy, nefa vatana mangatsiaka tsy nisy aina intsony feno dian-dratra sy vono no hitanay ». Taorian’ny fahitana ny razana, nanao fanadihadiana lalina avy hatrany mahakasika an’ity vono olona ity ny mpitandro filaminana any an-toerana. Rehefa nokarohina fatratra, voasambotra ilay lehilahy naka an’i Njato tao an-tranony. Hatramin’ny fotoana nanoratana ny lahatsoratra, mbola ao anatin’ny famotorana tanteraka ny zandary, ka ho hita eo ny tohin’ity raharaha izay mahavalalanina ny maro ity.
Eric Manitrisa