Vao nanomboka ny taona dia betsaka ny latsaka tao anaty fahakiviana sahady noho ny nafitsoky ny olon-dratsy. Isan’izany ny tokantrano iray tetsy Ambohimangakely izay raha tsy tao ny mponina tao aminy fa namonjy fety tany ivelany, ny jiolahy no nanjaka tokana tao. Ary tena efa fantatr’ireo olon-dratsy izay nokendreny sy ny toerana misy izany raha ny fiheverana ity fandrobàna ity : lasa ny scooter tsara tarehy izay miisa telo. Izany anefa dia efa nampidirina anaty trano, izany hoe efa tena mailo ny tompony. Kanefa dia mbola vitan’ireo olon-dratsy ihany ny naka izany nandritry ny alin’ny faran’ny taona. Tetsy Ambohitsoa indray, tokantrano roa no indray nasesin’ny olon-dratsy. Io indray dia amin’ny andro atoandrobe nanahary no tonga ny olon-dratsy. Tsy tao ny tompon-trano fa namonjy fivoriam-pianakaviana ary teo indrindra no nanararaotan’ireo nanatontosa ny fandrobàna. Nanara-po ireo jiolahy. Ny fanontaniana mipetraka dia ny hoe : ahoana ny fomba namantatan’ireo olon-dratsy ny tsy maha-eo ny tompon’ireo trano ka nahafahan’ireo namaritra ny fotoana nanaovana ny famakiana ny trano ? Toa efa mailo daholo ihany mantsy ny tsirairay ka efa samy manafinanina ny fandaharam-potoanany. Kanefa dia mbola hain’ireo jiolahy ihany ny fotoana tsy maha-eo ny olona. Midika izany fa misy mpitsikilo tsy ampoizina eny anivon’ny fiaraha-monina eny ary ireny no mikarama manome vaovao ny jiolahy. Paikadin’ny olon-dratsy efa hatry ny ela ihany izany.
D.R
