Ny sabotsy faha-9 janoary 2019 tokony ho tamin’ny 10 ora alina no nisy naka an-keriny tao an-tranony ny mpitsabo mpanampy iray miaraka amin’ny zaza roalahy tao Manakana Brieville ,Nirefodrefotra ny basy tao an-tanana ka rehefa lasa lavitra ireo jiolahy dia nasainy niverina ireo zanany roalahy ary nomen’ireo dahalo laharana finday izy ireo ahafahana mifandray, satria mitady 100 tapitrisa Ariary amin’ny fianakaviana ny jiolahy .Matahotra ireo fianakaviana satria raha niady varotra tamin’ireo mpaka an-keriny izy ireo dia ny fandrahonana ho faty ny havany no valinteny voaray .Na dia nanara-dia aza ny fianakaviana sy ny fokonolona dia sarotra ny dia, satria mamakivaky lohasaha sy havoana ny lalana. Eo ihany koa ny tsy fisian’ireo mpitandro ny filaminana hanampy amin’ireny toerana lavitra ireny, araka ny nambaran’ny fianakaviana .Araka ny vaovao farany voarain’ny fianakaviana dia efa fantatra ny toerana anafenana ilay mpitsabo ,efa reraka ihany koa izy, hoy ny filazana, satria manana aretina mitaiza ity mpitsabo ity .Manao antso ho amin’ny fanjakana mahefa ny fianakaviana ny hanampiana azy ireo hitady ny havany ary ny tokony hampidinana mpitandro ny filaminana any Manakana izay toerana anebakeban-tany amin’ny faritr’i Tsaratanana iny .Mirongatra indray ny fakana an-keriny any amin’ny faritra ambanivohitra Brieville sy Tsaratanana iny ary efa samy mailo sy mitandrina ny rehetra. Fantatra ihany koa fa mitokona sy miray hina ireo mpitsabo amin’iny faritra iny amin’ny tokony handraisana fepetra haingana hanavotana ny naman’izy ireo.
Janus R