Samy telo lahy. Andaniny, zandary izay nanao fisafoana. Ankilany, dahalo izay nandalo teo amin’ny fokontanin’Ambohidehibe, eo anivon’ny kaominin’Arivonimamo. « Tokony ho tamin’ny 8 ora alina ny alakamisy teo no nahatsikaritra lehilahy telo hafahafa fihetsika ny zandary nanao fisafoana. Rehefa narahina dia nandositra. Nampitandremana mba hijanona kanjo tifitra no valin’izany » raha araka ny fanazavan’ny zandary. Dia raikitra arak’izany ny fifamaliana tifitra teo amin’ny roa tonta ary nanakoako teo amin’ilay tanàna ny feom-basy. Tao anatin’izany no nisy dahalo iray lavo. Nanao tari-dositra kosa ny namany miisa roa ary tafaporitsaka tao anatin’ny haizina. Rehefa nohamarinina dia dahalo efa nokarohina hatry ny ela izay antsoina hoe Fidy mainty ilay maty voatifitra. « Malaza amin’ny halatr’omby ary nampihorohoro ny manodidina hatrizay i Fidy mainty. Mbola taraiky teny an-tanany ny basy poleta vita gasy » raha araka ny fanampim-panazavana avy amin’ny zandary hatrany. Efa nahazo fitarainana maro ny momba azy ary ny atoandron’io ny olona dia efa nihorohoro indray raha nahita azy nihaodihaody tao an-tanàna. Tsy nijanona teo amin’ny fahafatesan’ity jiolahy ity ny raharaha satria mitohy ny fikarohana ireo namany izay tafaporitsaka.
D.R
