Tsy mitazam-potsiny akory ireo mpitandro filaminana manoloana ity trangana fakàna an-keriny izay miseho lany eto an-drenivohitra sy ny manodidina ity. Ankoatry ny fananganana ny « cellule de crise » iray hiarahan’ireo mpitandro filaminanan telolafy, izay misehatra manerana ny Nosy araka ny voalazan’ny Emmo/Nat, dia nisy ihany koa ny hetsika manokana notanterahin’ireo zandary avy eo anivon’ny Vondron-tobim-pileovana Analamanga sy ireo hery rehetra eo ambany fibaikony, teto andrenivohitra. Fantatra tamin’izany fa efa misy tokoa ireo olona voasambotra tao anatin’ity raharaha ity, izay miisa 16 izy ireo. « Vahiny ny dimy, hoy hatrany ny fampitam-baovao ary malagasy ny ambiny ». Araka ny nambaran’ireo tomponandraikitra hatrany moa dia mazàna misy hifandraisany amin’ny resaka fandraisana zava-mahadomelina mahery vaika hatrany ny tranga misy, ankoatry ny ditraditra ataon’ireo tanora sy fitsoahana ny tokatranon’ireo ray aman-dreniny. Araka izany, saika mitodika tanteraka amin’izay ady amin’ny fiparitahan’ny zava-mahadomelina mahery vaika izay ny fanadihadiana lalilna ataon’ireo mpitandro filaminana ; ary izany dia hiarahan’izy ireo miasa amin’ireo sampan’asa maro toy ny CIS sy ny fadin-tseranana. Vokatr’izay fiaraha-miasa izay no nahatrarana ireo fitaovana sy ireto fanetriben’ny firenana ireto. Mitohy araka izany fikarohana ary ireo fitaovana eo am-pelantanan’ireo voarohirohy dia mbola hanaovana fikarohana ihany koa », raha ny fanazavana azo hatrany.
m.L
