Efa nahetsika avokoa ireo zandary any an-toerana, hikaroka ilay ankizivavy kely nalain’ny dahalo an-keriny, tany Vodiriana, fokontany Ambodimangan’i Betsiboka, ny alin’ny sabotsy teo, araka ny fampahafantarana nataon’ireo tomponandraikitra ambony teo anivon’ny Fibaikoan’ny Zandamariam-pirenena, notarihan’ny Kaomandin’ny zandary. « Tsy afaka ny hilaza zavatra betsaka izahay, fa ny azo lazaina dia efa nalamina ny tetik’ady rehetra hikarohana izany ankizy lasa an-keriny izany » hoy ity farany. Raha ny vaovao voaray avy any an-toerana tokoa mantsy, dia omaly hariva indray no fotoana nomen’ireo olon-dratsy hanomezana ilay vola, izay nihena ho telopolo tapitrisa ariary, ho sandan’ny famotsorana ilay ankizy. Raha tsiahivina ity tranga ity, dia nisy efatra ireo ankizy no nalain’ireo olon-dratsy. Ny roa avotra soa aman-tsara, « raha nisy ny tandrametaka tamin’ireo mpaka an-keriny, tamin’ny fitazonana azy ireo ». Ny iray kosa, namoy ny ainy rehefa avy nampijalijalin’ireo olon-dratsy ary notifirin’ireto tsy valahara nony ny farany, « ny antony mbola tsy fantatra hatreto », ary ny iray farany, izay ankizivavy vao efa-taona, mbola any am-pelan-tànan’ireo olon-dratsy any amin’izao fotoana izao. Ho hita eo araka izany ny mety ho tohiny…
m.L
