Vondron-tanora maromaro navondron’ny tambajotran-tserasera “facebook”, nahitana ny K501, ny Fitsa, ny fikambanan’ny tanora eo anivon’ny LJR,… ary ny fikambanana “Bekorontana”, no tonga maro be nanefa ny adidiny teny amoron-dranomasina nanadio izany, mba hananany haingo tsara amin’izao fotoana fialana amin’ny fihibohana izao, na mbola tsy afaka mitangorona eny aza ny rehetra. Nodiovina avokoa ireo fako rehetra teny amoron-dranomasina navelan’ireo mpitsangantsangana talohan’ny fihibohana. Gony maromaro ihany no voaangona tamin’izany. Nifanampy tamin’ireto tanora ireo nanatontosa izao hetsika izao ny governora sy ny ben’ny tanàna, tamin’ny fanampiana ara-pitaovana sy ny enti-manana. Tsy mifarana hatreo anefa ny hetsika atao, hoy ireto tanora ireto, fa amin’izao ankatoky ny fanadinana CEPE atao eto Toamasina tsy ho ela izao, dia manao hetsika eo am-panangonana “chocolat” hozaraina amin’ireo mpiadina indray izy ireo ankehitriny, tahaka ny nataon’izy ireo ny herinandro lasa iny nanangona lamba nozaraina tamin’ireo mahantra mipetraka ao amin’ny Dojo Soavita.
Malala Didier
