Niatrika ny mpitsara mpanao famotorana, omaly, ireo olona roa, vavy sy lahy, voasambotra taorian’ny fanafihana ny “perception” tetsy Analamahitsy. Nanapa-kevitra ny fitsarana fa hotazonina am-ponja vonjimaika ilay ramatoa. Ilay lehilahy kosa fantatra fa nahazo fahafahana vonjimaika. Ireo olona roa ireo dia anisan’ny voasambotra taorian’ny fanafihana niseho teny Analamahitsy. Nahatonga resaka be teto an-drenivohitra sy teny Analamahitsy moa ity fanafihana ity. Mbola maro mpandeha ny lalana no niseho ny fandrombana. Tsy mbola matory akory ny olona no nirefodrefotra ny basy. Nisitrika tany an-tranony avokoa ny mponina. Ireo liam-baovao no sahy nivoaka tsikelikely teny amin’ny arabe. Voalaza moa fa vola hatrany amin’ny 6 miliara tany no tao amin’ny biraon’ny hetra tamin’io hariva io. Ampahany betsaka no tafaverina.
Fa loharanom-baovao hafa indray no nahalanana fa avy eny amin’ny faritra Anosivavaka eny Ambohimanarina avokoa ireo olona maty voatifitra tamin’ny fanafihana ny “perception”. Loharanom-baovao fantatra teny amin’ny tranom-paty no ilazana fa rehefa tonga teny ny havan’ny maty vao nibaribary ny nafenina rehetra. Omaly, razana iray sisa tsy nisy naka teny amin’ny “morgue”.
r.s.
