Olona telo no voasambotra ka ny mpiambina ny Shop Liantsoa ihany ny iray. Tsy ela ny fanadihadiana dia nahitam-bokany ho an’ny polisy etsy Alasora. « Rehefa nanao ny fanadihadiana ny polisy dia fantatra fa ny mpiambina iray tao amin’ilay tranombarotra ihany no tompon’antoka tamin’ny asa ratsy ary naniraka ireo namany hanafika ilay tranombarotra (…) Nosamborina avy hatrany ity farany , nitohy ny famotorana ka tratra ihany koa ireo jiolahy roa lahy namany izay nirahiny nanao ilay fanafihana mitam-piadiana » raha araka ny fizaram-baovaon’ny polisy. Raha tsiahivina dia namoizana ain’olon-tsotra ity fanafihana izay nitranga ny harivan’ny alarobia ity. Vola mitentina 500.000 ariary no lasa ary mpamily fiarakaretsaka izay nitondra olona hividy zavatra tao amin’ny toerana voalaza no notifirin’ireo jiolahy teo amin’ny lohany ka maty tsy tsa-drano. Amin’ny andro tsy dia hariva be satria latsaky ny amin’ny fito ora, tsy vitan’izay koa fa amin’ny fotoana tena maha-betsaka mpivezivezy eo Ankadindratombo izay feno mpivarotra no misy tsena koa no niseho ny fitifirana. Nihoron-koditra ny olona ary nifampizara vaovao. Hatreto dia tsy azo ivezivezena amin’ny alina, manomboka amin’ny sivy ora. Mikatona ny bar sy ny karaoké ary izay mety ho toerana fandraisana lanonana manomboka amin’io ora voatondro io hatrany. Ny olona miasa amin’ny alina dia mitondra kara-panondrom-pirenena sy kara-manga ary ampiseho ny manam-pahefana izany. Didim-pitondràna navoakan’ny kaominina Alasora izany mba ho famerenana ny fandriam-pahalemana. Na eo aza izany rehetra izany, efa mba afaka misioka tokana aloha Ankadindratombo rehefa voasambotra ireto jiolahy mpamono olona ireto.
D.R
